**********
त्यो अनुहारमा
दुई आँखा घाम–जून चम्कन्छन्
उडिरहन्छ आत्मविश्वासको एउटा चङ्गा ।
आपद्विपद्को हावाहुरीमा जुध्दै
मुस्कुराउँछन् सुन्दर सुनाखरी र गुराँस ।
त्यो अनुहारमा
हरेक बिहान नयाँ दिनको भारी बोक्न
उदाउँछ एउटा घाम
जो साँझमा दुःखका धर्सा छोप्दै
खुसीका ससाना पोका बोक्दै
आइपुग्छ उज्यालो पार्दै घर–आँगनमा ।
त्यो अनुहारमा
संसार पढ्ने आँखाहरू चिम्सा छन्
थेप्चो छ आत्मसम्मान उचाल्दै उभिएको नाक
चाउरिएको छ सुखदुःखले चिप्लेटी खेल्ने गाला
कलेटी परेको छ मुस्कानले लेफ्ट–राइट गर्ने ओठ
घामले डढेको छ मङ्गोल पहिचान ।
मलाई राम्रो लाग्छ
धेरै राम्रो लाग्छ
जब सबले सुनाउँछन्–
“तेरो अनुहार काटीकुटी तेरै बाको जस्तो ।”
x
कोई टिप्पणी नहीं:
एक टिप्पणी भेजें